საქორწილო სუფრა: რომელი კერძები არ შევიტანოთ მენიუში

ქართული სამზარეულო თითქმის ყველას მოსწონს, მაგრამ, შეიძლება გაგიკვირდეთ, საქორწილო სუფრას ყველა კერძი არ უხდება. ჩვენი გამოცდილებისა და ქორწილის ორგანიზატორების დაკვირვების საფუძველზე შევადგინეთ იმ კერძების სია, რომლებიც სადღესასწაულო სუფრაზე ნაკლებად მოხდენილად გამოიყურება.

ზოგიერთი თევზის კერძი. ძვლებთან გამკლავება საზეიმო ტანსაცმელსა და დახვეწილ მანიკიურში მყოფი სტუმრისთვის არც ისე მოსახერხებელი და ესთეტიკურია.

ძვლიანი ქათმის კერძები, მაგალითად, ჩაშუშული ან საცივი. მიზეზი იგივეა. თუ საცივი ძალიან გსურთ, რესტორანს ჰკითხეთ, ამზადებენ თუ არა მას ქათმის ფილეთი — ეს პრობლემას მოაგვარებს.

თხევადი კერძები, მაგალითად, ჩაქაფული ან ხარჩო. ძალიან გემრიელია, მაგრამ სადღესასწაულო სუფრისთვის ნაკლებად მოსახერხებელია.

გვაპატიეთ, მაგრამ ამ სიაში ხინკალიც შედის. მისი ჭამა ძალიან სასიამოვნოა, თუმცა ამის ყურება ყოველთვის არა. პატარძალი, რომელსაც ბულიონი ხელებზე ჩამოსდის, კოლორიტულად გამოიყურება, მაგრამ დახვეწილ და რომანტიკულ კადრს ნაკლებად ქმნის.
 

ლობიო ქოთანში. ეს ცალკე პორციული კერძია და, ფაქტობრივად, სრულფასოვანი სადილი. მაშინ სხვა კერძები რისთვის გვჭირდება?
 

ტრადიციული მწნილები. ქართული ქორწილი ღვინოს უკავშირდება, მწნილები კი უფრო არაყს უხდება. თუ მომავალი მამამთილი ან სიმამრი საფერავის ნაცვლად არაყს ამჯობინებს, მწნილის თეფში მის ახლოს დადგით.

თქვენ რომელ კერძს არ მიიჩნევთ შესაფერისად საქორწილო სუფრისთვის?